خیابان بخاری میں خاتون پر ڈمبل سے حملے کی ایک اور ہولناک ویڈیو سامنے آ گئی
کراچی (29 اگست 2026): ڈیفنس، خیابان بخاری میں خواتین کے درمیان ہونے والے جھگڑے میں، جس میں ایس ایس پی فدا حسین جانوری کی رشتہ دار خاتون مریم علی رضا نے ایک خاتون اور ان کے بھائی پر ڈمبل سے حملہ کیا، ایک اور ہولناک موبائل فوٹیج سامنے آئی ہے۔
اس بار ڈیفنس فیز 6 خیابان بخاری میں خاتون پر تشدد کے واقعے کی ایک موبائل ویڈیو سامنے آئی ہے، جس میں مریم علی رضا نامی خاتون کو ڈمبل سے دوسری خاتون پر تشدد کرتے دیکھا جا سکتا ہے۔
فوٹیج میں خاتون کو ایکسر سائز میں استعمال ہونے والے ڈمبل سے متعدد وار کرتے دیکھا گیا، سرخ لباس میں ملبوس خاتون پولیس اہلکاروں کی سرپرستی میں دوسری خاتون پر تشدد کرتی رہی۔
ویڈیو میں نظر آنے والے اہلکار متاثرین کو انصاف دلانے کی بہ جائے تشدد کرنے والی خاتون کو تحفظ فراہم کرتے رہے، پولیس حکام نے کہا ہے کہ اس واقعے کی تحقیقات کے بعد ذمہ دار عناصر کے خلاف قانونی کارروائی کی جائے گی۔