ٹیچر کے تھپڑ مارنے پر 6 سالہ طالبعلم چل بسا، فوٹیج سامنے آگئی

انڈین میڈیا رپورٹس کے مطابق طالبعلم کے والدین نے الزام عائد کیا ہے کہ بیٹے کو ہوم ورک مکمل نہ کرنے پر خاتون ٹیچر نے تشدد کا نشانہ بنایا، بچہ ڈر گیا، رونے اور کھانسنے لگا اور بعد میں اسکول میں ہی بے ہوش ہو کر گر پڑا۔

کلاس روم کی سی سی ٹی وی فوٹیج میں خاتون ٹیچر کو کم عمر طالبعلم کو ڈانٹتے ہوئے دیکھا جا سکتا ہے جس کے بعد وہ رونے لگتا ہے اور منت سماجت کرتا دکھائی دے رہا ہے۔

پولیس سی سی ٹی وی فوٹیج کا جائزہ لے رہی ہے۔ تاہم لواحقین کا الزام ہے کہ بچے کو مردہ حالت میں اسپتال لایا گیا تھا، خاتون ٹیچر اور اسکول انتظامیہ کے خلاف سخت کارروائی کی جائے۔

پولیس نے واقعے کا مقدمہ درج کر کے تفتیش شروع کر دی۔ موت کی اصل وجہ کا تعین پوسٹ مارٹم رپورٹ آنے کے بعد ہو سکے گا۔