کینیڈا: پاکستانی نژاد خاتون رکن پارلیمنٹ کی گاڑی کو آگ لگادی گئی

بین الاقوامی خبر رساں ادارے کی رپورٹ کے مطابق کینیڈا کے شہر اسکاربورو میں ایک گھر کے ساتھ کھڑی گاڑی کو نامعلوم افراد نے آگ لگا دی۔

پولیس نے اس حوالے سے بتایا کہ جلائی جانے والی گاڑی کینیڈا کی پاکستانی نژاد خاتون رکنِ پارلیمنٹ سلمیٰ زاہد کی ہے جو ان کے گھر کے باہر کھڑی تھی۔ یہ وقعہ رات ڈیڑھ بجے پیش آیا جب علاقے میں سناٹا تھا۔

پولیس کے مطابق یہ ایک پُرامن اور محفوظ علاقہ سمجھا جاتا ہے اس کے باوجود اس علاقے میں ایسی کارروائی کا ہوجانا باعث تشویش ہے۔

سلمیٰ زاہد کے مطابق خوش قسمتی سے حملے کے وقت میں اور اہل خانہ گھر کے اندر موجود تھے اس لیے سب محفوظ رہے ہیں۔ مجھے ابھی تک یقین نہیں آرہا۔

رائل کینیڈین ماؤنٹیڈ پولیس نے مقامی پولیس کی مدد سے تحقیقات کا آغاز کردیا ہے، جسے ابتدائی تفتیش میں نفرت پر مبنی جرم قرار دیا جا رہا ہے۔