نیوکلیئر سائنس اولمپیاڈ 2026: ہندوستانی و عالمی طالب علموں کو پچھاڑ کر پاکستان کے 3 تمغے
سعودی عرب کے شہر جدہ میں منعقدہ بین الاقوامی مقابلے میں پاکستانی طلبہ نے 1 گولڈ اور 2 سلور میڈلز جیت لیے۔
سعودی عرب کے شہر جدہ میں منعقد ہونے والے تیسرے 'انٹرنیشنل نیوکلیئر سائنس اولمپیاڈ 2026' میں پاکستانی طالب علموں نے شاندار کامیابی حاصل کرتے ہوئے مجموعی طور پر ایک گولڈ اور دو سلور میڈلز اپنے نام کیے ہیں۔ انٹرنیشنل ایٹمک انرجی ایجنسی (IAEA) کے تعاون سے منعقدہ اس عالمی مقابلے میں چین، روس، ترکیہ اور جاپان سمیت 19 سے زائد ممالک کے 120 کے قریب ہونہار طالب علموں نے شرکت کی تھی۔ پاکستان اٹامک انرجی کمیشن (PAEC) اور پائیاس (PIEAS) یونیورسٹی کی زیرِ نگرانی تربیت حاصل کرنے والے طالب علم محمد علی (گورنمنٹ کالج یونیورسٹی لاہور) نے گولڈ میڈل جیتا۔ جبکہ محمد عثمان (راولپنڈی) اور سیرت فاطمہ بھٹی (کراچی) نے چاندی کے تمغے حاصل کیے۔ اس شاندار عالمی کامیابی کے بعد پاکستان کو 2027 میں چوتھے بین الاقوامی نیوکلیئر سائنس اولمپیاڈ کی میزبانی بھی سونپ دی گئی ہے۔