نیپال اور تبت میں قیامت خیز سیلاب، 9 افراد ہلاک، 384 لاپتا

زلزلے کے بعد برف اور چٹانوں کا تودہ دریا میں گرنے سے ہر طرف تباہی مچ گئی، سڑکیں، پل اور مکانات کاغذ کی مانند بہہ گئے، اب تک 384 شہری لاپتہ ہونے کی اطلاعات ہیں۔

رائٹرز کی رپورٹ کے مطابق تباہ کن سیلابی ریلے نے سڑکوں، پلوں، مکانات اور بجلی کے منصوبوں کو نقصان پہنچایا، جبکہ مٹی کے تودے نے تبت سے ملحقہ اہم زمینی گزرگاہ گیرونگ پورٹ کو بھی متاثر کیا، جس کے باعث سڑکوں، مواصلاتی نظام اور بجلی کی فراہمی میں خلل پڑا۔

قیامت خیز زلزلے اور سیلاب سے پوری کی پوری آبادی کا وجود ہی ختم ہوگیا، سیکڑوں سیاح لاپتہ ہوگئے، جن میں 12 برطانوی بھی شامل ہیں۔

سیلاب بدھ کی صبح سویرے نیپال کے دار الحکومت کٹھمنڈو کے شمال میں واقع ضلع رسووا میں آیا، برف کا غیرمعمولی رفتار سے پگھل کر بھوٹے کوشی دریا میں شامل ہونا سیلاب کا سبب بنا۔

تبت اور نیپال کی سرحد کے دونوں جانب سرچ آپریشن جاری ہیں۔ اب تک 12 افراد کو بچایا جاسکا ہے۔ چین کے سرکاری ذرائع ابلاغ کے مطابق تبت میں جانی نقصان بہت زیادہ ہوا ہے۔ نیپالی حکام کا کہنا ہے انہیں بڑے پیمانے پر نقصان کا خدشہ ہے۔

حکام کے مطابق تاحال 384 افراد لاپتا ہیں، جن میں 105 بھارتی، 93 نیپالی، 3 امریکی اور 12 برطانوی شہری شامل ہیں۔

نیپال میں پن بجلی کے منصوبے پر کام کرنے والے 8 جنوبی کوریائی شہری بھی لاپتا افراد میں شامل ہیں۔ دیگر لاپتا افراد میں 17 ملائیشین، 4 جنوبی افریقی جبکہ آسٹریلیا اور نیدرلینڈز کا ایک، ایک شہری شامل ہے۔

نیپال کے متعلقہ حکام نے خبردار کیا ہے کہ خطرہ ابھی مکمل طور پر ٹلا نہیں کیونکہ دریا کے بالائی حصے میں رکاوٹ بدستور موجود ہے، جس کے باعث دوسرے سیلاب کا خدشہ برقرار ہے۔