نیپال: لوگوں نے سیلابی ریلے میں بہنے والی تجوری توڑ کر لاکھوں روپے لوٹ لیے

نیپال میں آنے والے تاریخ کے بدترین سیلاب کے راستے میں آنے والی ہر چیز خس وخاشاک کی طرح بہہ گئی۔ لوگوں کی قیمتی اشیا بھی پانی برد ہوئیں تو ان ہی میں بینک کی تجوریاں بھی بہتی نظر آئیں۔

غیر ملکی میڈیا کے مطابق سیلابی ریلے میں ایک بینک کی تجوری بھی بہتی ہوئی آئی تو مقامی افراد نے اس کو اپنے قابو میں کیا اور پھر اسے توڑ کر موجود لاکھوں روپے کی رقم لوٹ لی۔

تاہم قانون بھی حرکت میں آیا اور پولیس نے تجوری توڑ کر اس میں موجود رقم نکالنے کے الزام میں 29 افراد کو حراست میں لے لیا۔

پولیس کے مطابق ابتدائی تلاشی کے دوران 29 افراد کو حراست میں لیا گیا، زیرحراست افراد کی عمریں 19 سے 49 سال کے درمیان ہیں۔ جبکہ ان کے قبضے سے 92 لاکھ 68 ہزار 505 نیپالی روپے (57 لاکھ پاکستانی روپے) برآمد ہوئے۔

اس سے قبل نیپال کے سیلابی میں بہہ کر آنے والی خاتون کی لاش کے کانوں سے درندوں نے سونے کی بالیاں اتاری تھیں، تاہم وہ لوگ بھی گرفتار کر لیے گئے تھے۔