بابر اعظم کے سر ایک بار پھر قومی ٹیم کی قیادت کا تاج سج گیا۔

پاکستان کرکٹ بورڈ کی سلیکشن کمیٹی کے سربراہ عاقب جاوید نے ممبران مصباح الحق اور اسد شفیق کے ہمراہ ایک پریس کانفرنس میں بڑا اعلان کرتے ہوئے اسٹار بلے باز بابر اعظم کو ایک بار پھر قومی ٹیسٹ ٹیم کا کپتان مقرر کر دیا ہے۔ بابر اعظم دورہ ویسٹ انڈیز میں پاکستان ٹیم کی قیادت کریں گے، جس کے لیے سلیکشن کمیٹی نے 16 رکنی اسکواڈ کا اعلان بھی کر دیا ہے۔ یہ اہم فیصلہ اس وقت سامنے آیا جب سابق کپتان شان مسعود کی ڈھائی سالہ قیادت میں ٹیم کی کارکردگی انتہائی مایوس کن رہی، جہاں پاکستان کو 16 میں سے 12 ٹیسٹ میچوں میں شکست کا سامنا کرنا پڑا، جس میں بنگلہ دیش کے ہاتھوں ہوم اور اوے دونوں سیریز میں شرمناک وائٹ واش بھی شامل ہے۔ واضح رہے کہ بابر اعظم نے 2023 کے ون ڈے ورلڈ کپ کے بعد خود کپتانی چھوڑی تھی، لیکن اب ٹیم کو مسلسل ناکامیوں سے نکالنے کے لیے سلیکٹرز نے ایک بار پھر ان کے سر پر قیادت کا تاج سجا دیا ہے۔