’’جڑواں دلہنیں، جڑواں دولہے اور جڑواں ہی پادری‘‘، شادی کی انوکھی تقریب

دنیا میں کئی ایسی شادیاں ہوئی ہیں، جن میں جڑواں بھائیوں نے جڑواں بہنوں سے شادیاں کیں، لیکن حال ہی میں ایک ایسی منفرد شادی ہوئی جس میں صرد دولہا اور دلہن ہی جڑواں نہیں بلکہ ان شادی کی رسومات ادا کرنے والے پادری اور ان کے معاون بھی جڑواں بھائی نکلے۔

شادی کی یہ دلچسپ تقریب بھارتی ریاست کیرالہ میں کیتھولک عیسائی خاندان کی ہوئی، جس کی تفصیلات میڈیا پر آنے کے بعد سب اس منفرد شادی پر دلچسپ تبصرے کر رہے ہیں۔

غیر ملکی میڈیا کے مطابق کیرالہ میں چنگنّاسری کے تاریخی سینٹ میری سائیرو مالابار میٹروپولیٹن کیتھیڈرل میں یہ انوکھی شادی کی تقریب منعقد ہوئی۔

چرچ میں جڑواں بھائیوں اکھیل کے تھامس اور نکھل کے تھامس نے جڑواں بہنوں میگی میری تھامس اور ماریا میری تھامس کو جیون بھر کا ساتھی بنایا۔

اس شادی کی تقریب میں دونوں خاندانوں کے افراد شریک تھے۔ تاہم شرکا اس وقت حیران ہوئے، جب ان شادی کی رسومات انجام دینے والے پادری اور پھر ان کے معاونین بھی جڑواں نکلے۔

جی ہاں یہ کسی فلم کا منظر نامہ نہیں بلکہ حقیقی زندگی کا دلچسپ واقعہ ہے۔

شادی کی دعائیہ تقریب میں جڑواں پادریوں فادر اینٹو پیزھم کٹل اور فادر اجو پیزھم کٹل نے شادی کی رسومات ادا کیں۔ اس تقریب میں پادریوں کے معاونین بھی جڑواں بھائی جیرون جیمز اور جوہون جیمز تھے۔

سوشل میڈیا پر شادی کی تقریب وائرل ہوتے ہی اس پر دلچسپ تبصرے کیے جا رہے ہیں۔