انسان نما روبوٹ نے یوسین بولٹ کا عالمی ریکارڈ توڑ دیا، ویڈیو

چین میں تیار کیے گئے دو ٹانگوں والے ہیومنائیڈ روبوٹ ’لائٹننگ‘ نے 100 میٹر دوڑ میں عالمی ریکارڈ قائم کرتے ہوئے معروف ایتھلیٹ یوسین بولٹ کا ریکارڈ توڑنے کا دعویٰ کیا ہے۔

چینی سرکاری نشریاتی ادارے کے مطابق اسمارٹ فون کمپنی آنر کے تیار کردہ روبوٹ ’لائٹننگ‘ نے بیجنگ میں ہونے والے ورلڈ ہیومنائیڈ روبوٹ گیمز کے دوران 100 میٹر کا فاصلہ صرف 9.32 سیکنڈ میں طے کیا۔

یوسین بولٹ نے 2009 میں 100 میٹر کا عالمی ریکارڈ 9.58 سیکنڈ میں قائم کیا تھا، جسے انسانی ایتھلیٹس کے لیے طویل عرصے سے ایک تاریخی معیار سمجھا جاتا ہے۔

لائٹننگ روبوٹ اس سے قبل رواں برس ایک دوڑ میں مردوں کے ہاف میراتھن کا ریکارڈ بھی توڑ چکا ہے، جہاں اس نے 21.1 کلومیٹر کا فاصلہ 50 منٹ اور 26 سیکنڈ میں مکمل کیا تھا۔

روبوٹ تیار کرنے والی کمپنیاں اگرچہ ان ٹیکنالوجیز کے بنیادی استعمال کو فیکٹریوں، گوداموں اور دیگر مقامات پر معمول کے کام انجام دینے تک محدود قرار دیتی ہیں، تاہم چین کی جانب سے اس شعبے میں بڑے پیمانے پر سرمایہ کاری نے مغربی ممالک کی توجہ حاصل کرلی ہے۔