ڈیزل کی قیمت میں بڑی کمی، پیٹرول مہنگا کردیا گیا

پیٹرولیم ڈویژن کی جانب سے جاری کردہ نوٹیفکیشن کے مطابق ڈیزل کی قیمت میں 32 روپے 63 پیسے فی لیٹر کمی کی گئی ہے جس کے بعد نئی قیمت 363 روپے 6 پیسے ہوگئی ہے۔

پیٹرول 2 روپے 97 پیسے فی لیٹر مہنگا کیا گیا ہے جس کے بعد نئے نرخ 337 روپے 51 پیسے ہوگئے ہیں۔

واضح رہے کہ پیٹرولیم مصنوعات کی قیمتوں میں ردوبدل ایک روز کے لیے کیا گیا ہے۔

گزشتہ روز پیٹرول کی قیمت میں 3 روپے 34 پیسے فی لیٹر اضافہ کیا گیا تھا جس کے بعد نئی قیمت 334 روپے 54 پیسے ہوگئی تھی۔

ڈیزل 5 روپے 27 پیسے فی لیٹر مہنگا کیا گیا جس کے بعد نئے نرخ 395 روپے 69 پیسے ہوگئے تھے۔
اس سے قبل وزیر پیٹرولیم علی پرویز ملک نے وزیر اطلاعات و نشریات عطا اللہ تارڑ کے ہمراہ پریس کانفرنس کرتے ہوئے اعلان کیا تھا کہ ڈیزل کی قیمت میں 30 سے 32 روپے کی کمی کی جائے گی، ریفائنریوں کی مدد سے قیمت میں نمایاں کمی کی جا رہی ہے۔

علی پرویز ملک نے کہا تھا کہ جنگ کی وجہ سے ہمارے عوام کو تکلیف درپیش ہے، مسائل حل کرنے کیلیے ہر ممکن اقدام کیا جائے گا، آئی ایم ایف سے مشاورت کے ساتھ ٹیکس میں ریلیف کی کوشش کی گئی، ہماری قیادت جو کاوشیں کر رہی ہے یقین ہے مشکلات سے نکل آئیں گے، حکومت اپنے تمام تر وسائل بروئے کار لاتے ہوئے مسائل حل کرے گی۔

ان کا کہنا تھا کہ وزیر اعظم نے عوام کا درد رکھتے ہوئے بڑے ریلیف کا اقدام کیا ہے، حکومت کی جانب سے آئل ریفائنریوں کا شکریہ ادا کرتے ہیں، عوام سے گزارش ہے کہ تھوڑا تحمل رکھیں۔