راولپنڈی، اسلام آباد اور گرد و نواح میں موسلادھار بارش، نشیبی علاقے زیر آب، رین ایمرجنسی نافذ

موسلادھار بارش کے باعث واسا راولپنڈی ہائی الرٹ پر ہے، اور رین ایمرجنسی نافذ کی گئی ہے، ایم ڈی واسا کا کہنا ہے کہ رواں مون سون سیزن کا یہ سب سے ہیوی اسپیل ہے، مجموعی طور پر 140 ملی میٹر سے زائد بارش ریکارڈ کی جا چکی ہے۔چکلالہ کنٹونمنٹ بورڈ کے نشیبی علاقے زیر آب آ چکے ہیں، سڑکوں اور گلیوں میں بارش کا پانی جمع ہو گیا ہے، مری روڈ ڈھوگ کھبا، جامع مسجد روڈ صادق آباد کے علاقے بھی متاثر ہوئے ہیں، جب کہ واسا کی ہیوی مشینری اور عملہ نکاسئ آب کے آپریشن میں مصروف ہے، ایسے میں جاوید کالونی، ندیم کالونی اور مسلم کالونی کے مکینوں کو محفوظ مقام پر منتقل ہونے کی ہدایت کی گئی ہے۔

ایم ڈی واسا کے مطابق لیاقت باغ، کمیٹی چوک انڈر پاس، مری روڈ، صادق آباد، سٹی صدر روڈ، ڈھوک کھبہ، ملت کالونی اور آریہ محلے میں نکاسئ آب کے لیے ہیوی مشینری اور عملہ موجود ہے، جب کہ نالہ لئی اور شہر بھر کے نالوں کی مسلسل مانیٹرنگ کی جا رہی ہے، ایم ڈی نے بتایا کہ کٹاریاں کے مقام پر پانی لیول 20 فٹ، گوالمنڈی پل پر 17 فٹ ریکارڈ کیا گیا ہے۔سیدپور میں 9 ملی میٹر، گولڑہ میں 145 ملی میٹر، بوکرہ میں 134 ملی میٹر بارش، پی ایم ڈی میں 48 ملی میٹر، شمس آباد میں 47 ملی میٹر، کچہری میں 61 ملی میٹر، پیرودھائی میں 106 ملی میٹر، گوالمنڈی میں 79، نیو کٹاریاں میں 78 ملی میٹر بارش ریکارڈ کی گئی ہے۔