کراچی میں کینسر کی مریض بچی ٹریفک جام میں پھنس گئی

اے آر وائی نیوز کے مطابق کراچی کے علاقے عیسیٰ نگری میں علاقہ مکینوں کی جانب سے بجلی کی عدم فراہمی پر احتجاج کیا گیا جس کے نتیجے میں گاڑیوں کی طویل قطاریں لگ گئیں۔

ننھی بچی کو اہلخانہ چیک اپ کے لیے اسپتال لے جارہے تھے۔ اہلخانہ نے بتایا کہ بچی کو چیسٹ کینسر ہے اور اسے یورین کا بیگ لگایا ہوا ہے لیکن احتجاج کی وجہ سے ٹریفک جام میں پھنس گئے ہیں۔

دوسری جانب علاقہ مکینوں کا کہنا ہے کہ 15 روز سے پانی اور بجلی کی بندش کا سامنا ہے جس کی وجہ سے احتجاج کرنے پر مجبور ہیں۔

واضح رہے کہ احتجاج کے باعث غریب آباد سے حسن اسکوائر جانے والی سڑک ٹریفک کے لیے بند کردی گئی ہے، ٹریفک کو لیاقت آباد نمبر 10، کریم آباد، غریب آباد اندر بائی پاس سے موڑا جارہا ہے۔

حسن اسکوائر یوٹرن سے ٹریفک کو یونیورسٹی روڈ، نیپا بھیجا جارہا ہے، حسن اسکوائر سے لیاقت آباد جانے والے روڈ پر بھی ٹریفک کی روانی متاثر ہے۔