ڈی پورٹ ہونے والی پاکستانی اسلام آباد میں گرفتار، مقدمہ درج

اے آر وائی نیوز کے مطابق ایف آئی اے اینٹی ہیومن ٹریفکنگ سرکل اسلام آباد نے کارروائی کرتے ہوئے 10 افراد کیخلاف مقدمہ درج کیا ہے۔

ترکیہ سے ڈی پورٹ ہونے والے 6 افراد پر یورپ جانے کی غیرقانونی کوشش کا الزام ہے جبکہ اٹلی، کویت اور سعودی عرب سے آنے والوں پر بھی غیرقانونی داخلے اور اوور اسٹے کا الزام ہے۔

ترجمان ایف آئی اے کا کہنا ہے کہ ملزمان کے پاسپورٹ، سفری دستاویز اور موبائل فونز قبضے میں لے لیے گئے ہیں۔

یہ پڑھیں: مزید افغانیوں کو ڈی پورٹ کر دیا گیا

واضح رہے کہ 4 اگست کو بھی ترکیہ سے غیر قانونی سرحد عبور کرنے پر ڈی پورٹ ہونے والے 10 پاکستانی شہریوں کیخلاف مقدمہ درج کیا گیا تھا۔

ایف آئی اے امیگریشن نے اسلام آباد ائیرپورٹ پر پہنچنے والے تمام 10 ڈیپورٹیز کو حراست میں لیا۔ مسافروں کو مزید قانونی کارروائی کے لیے اینٹی ہیومن ٹریفکنگ سرکل اسلام آباد کے حوالے کر دیا گیا تھا۔

ایف آئی اے کا کہنا تھا کہ ڈیپورٹ ہونیوالے مسافروں نےایجنٹس کو 2سے 12 لاکھ روپے تک کی ادائیگیاں کی تھیں، مسافروں نے غیر قانونی راستوں کے ذریعے ترکیہ میں داخل ہونے کی کوشش کی تو ترکیہ پولیس نے مسافروں کو گرفتار کر کے پاکستان ڈیپورٹ کر دیا۔