کاکروچ جنتا پارٹی کے بانی کیخلاف مقدمہ درج

بھارتی میڈیا کے مطابق مہاراشٹر کی پولیس نے کاکروچ جنتا پارٹی کے بانی ابھیجیت ڈپکے کے خلاف مقدمہ درج کر لیا ہے۔ یہ مقدمہ ضلع پریشد اسکول کیے ٹیچر شمشاد بانو کی مدعیت میں درج کیا گیا ہے۔

مقدمے میں ابھیجیت ڈپکے پر ساتھیوں سمیت ایک سرکاری اسکول میں بغیر اجازت داخل ہونے، سرکاری کام میں خلل ڈالنے اور اساتذہ کو ہراساں کرنے کے الزامات عائد کیے گئے ہیں۔

مزید الزام یہ بھی لگایا گیا ہے کہ ڈپکے نے اسکول میں جاری کارروائی کی ویڈیو بھی بنائی اور اسے سوشل میڈیا پر شیئر کیا۔

پولیس نے شکایت کی بنیاد پر دفعات 132، 329(3)، 351(2) اور 356(2) کے تحت ایف آئی آر درج کی ہے۔ ان دفعات میں سرکاری ملازم کو اس کی ذمہ داری ادا کرنے سے روکنے کے لیے حملہ یا مجرمانہ طاقت کا استعمال، مجرمانہ طور پر داخل ہونا، دھمکی دینا اور مجرمانہ ہتک عزت سے متعلق دفعات شامل ہیں۔

پولیس حکام کا کہنا ہے کہ معاملے کی مزید تفتیش جاری ہے اور ایف آئی آر میں لگائے گئے الزامات کی مکمل جانچ کی جارہی ہے۔

واضح رہے کہ یہ مقدمہ ایسے وقت درج کیا گیا ہے جب ابھیجیت ڈپکے اور ان کے ساتھی ’’اسکول ٹھیک کرو‘‘ مہم کے تحت مہاراشٹر کے مختلف اضلاع میں سرکاری اسکولوں کے دورے کر رہے ہیں۔