یوٹیوب پر ویوز گننے کا طریقہ کار تبدیل، نیا نظام 24 اگست سے نافذ ہوگا

یوٹیوب نے ویڈیوز کے ویوز شمار کرنے کے طریقہ کار میں اہم تبدیلی کا اعلان کردیا ہے، جس کے تحت 24 اگست 2026 سے پلیٹ فارم پر تمام ویڈیو فارمیٹس کے لیے ویو کاؤنٹنگ کا نیا نظام نافذ کیا جائے گا۔ اس تبدیلی کا مقصد یوٹیوب کے مختلف ویڈیو فارمیٹس میں ویوز شمار کرنے کے طریقے کو مزید یکساں بنانا ہے۔

نئے نظام کے تحت کسی ویڈیو کا ویو اس وقت شمار ہوجائے گا جب ویڈیو چلنا شروع ہوگی، یعنی پہلے فریم سے ہی ویو ریکارڈ کیا جائے گا۔ اس کے لیے پہلے کی طرح کم از کم مخصوص مدت تک ویڈیو دیکھنے کی شرط نہیں ہوگی۔ یہ تبدیلی لانگ فارم ویڈیوز اور لائیو اسٹریمز سمیت دیگر ویڈیو فارمیٹس پر بھی لاگو ہوگی۔

یوٹیوب کے مطابق نئے طریقہ کار کے باعث تخلیق کاروں کی ویڈیوز کے پبلک ویو کاؤنٹ میں تیزی سے اضافہ نظر آسکتا ہے، کیونکہ ویڈیو شروع ہوتے ہی ویو شمار ہوجائے گا۔ تاہم اس تبدیلی کا براہِ راست اثر کریئیٹرز کی آمدنی یا یوٹیوب پارٹنر پروگرام (YPP) کی اہلیت پر نہیں پڑے گا۔

مونیٹائزیشن اور کارکردگی کے لیے یوٹیوب اب بھی انگیجڈ ویوز اور انگیجڈ واچ آورز جیسے میٹرکس کو اہمیت دے گا۔ اس لیے صرف پبلک ویوز میں اضافے کو آمدنی میں اضافے کے برابر نہیں سمجھا جائے گا۔

یہ تبدیلی کریئیٹرز کے لیے خاصی اہم قرار دی جارہی ہے، کیونکہ ویڈیو کے پبلک ویوز زیادہ تیزی سے بڑھ سکتے ہیں، جبکہ حقیقی ناظرین کی دلچسپی جانچنے کے لیے واچ ٹائم اور انگیجمنٹ جیسے اعداد و شمار بدستور اہم رہیں گے۔