ایران میں قدرتی گیس کے نئے اور بڑے ذخائر دریافت

امریکا سے جاری جنگ کے دوران ایران کے لیے اچھی خبر ہے کہ جنوبی صوبے فارس میں قدرتی گیس کے نئے ذخائر دریافت ہوئے ہیں۔ دریافت ہونے والی گیس فیلڈ میں 7.5 ٹریلین کیوبک فٹ سے زائد گیس موجود ہے۔

غیر ملکی میڈیا کے مطابق ایرانی وزیر تیل محسن پاک نژاد نے صوبہ فارس میں گیس کے نئے ذخائر دریافت ہونے کی خبر کی تصدیق کرتے ہوئے کہا ہے کہ دریافت ذخیرے سے تقریباً 5.7 کیوبک فٹ گیس قابل حصول ہے جو ایران کے بڑے گیس فیلڈ جنوبی پارس کے ایک فیز سے 15 برس کی پیداوار کے مساوی ہے۔

وزیر تیل کے مطابق نئی گیس فیلڈ میں موجود گیس سویٹ گیس ہے جس سے اس کی ترقی اور پیداواری اخراجات میں کمی آئے گی۔

ایرانی وزیرِ پیٹرولیم نے مزید بتایا کہ نئی گیس فیلڈ میں قدرتی گیس کے ساتھ مائع گیس کے بھی بڑے ذخائر موجود ہیں۔ ان کے مطابق قدرتی اور مائع گیس کے یہ ذخائر ایران کی دولت میں اربوں ڈالرز کا اضافہ کر سکتے ہیں۔

واضح رہے کہ ایران میں قدرتی گیس کے نئے ذخائر ایسے وقت دریافت ہوئے ہیں، جب امریکا سے اس کی کشیدگی عروج پر ہے اور امریکا نے دنیا میں اس کو معاشی طور پر تنہا کرنے کے لیے کئی نئی اور سخت پابندیاں عائد کی ہیں۔