ملک بھر میں بارشوں اور برفباری کا الرٹ: این ڈی ایم اے نے ہنگامی صورتحال سے نمٹنے کے لیے ہدایات جاری کر دیں

اسلام آباد: نیشنل ایمرجنسیز آپریشن سینٹر (NEOC) نے ملک کے موجودہ موسمی حالات کے پیشِ نظر الرٹ جاری کر دیا ہے، جو کہ ادارے کی جانب سے جنوری میں کی گئی پیش گوئی کے عین مطابق ہے۔ این ڈی ایم اے کے مطابق اپریل سے جون تک کے ممکنہ موسمی حالات کا جائزہ بھی مکمل کر لیا گیا ہے۔

خیبر پختونخوا: 5 اپریل تک پشاور، نوشہرہ، مردان اور چارسدہ سمیت کئی اضلاع میں سیلابی صورتحال کا خدشہ ہے۔ چترال، سوات، مانسہرہ اور ایبٹ آباد سمیت دیگر علاقوں میں آندھی اور بارش متوقع ہے۔

پنجاب: اسلام آباد، راولپنڈی، لاہور، فیصل آباد، ملتان اور سیالکوٹ سمیت صوبے کے بیشتر شہروں میں اگلے 12 سے 24 گھنٹوں میں گرج چمک اور ژالہ باری کا امکان ہے۔
کراچی، حیدرآباد، سکھر اور لاڑکانہ سمیت سندھ کے مختلف اضلاع جبکہ کوئٹہ، گوادر، قلات اور ژوب سمیت بلوچستان کے کئی شہروں میں تیز ہواؤں کے ساتھ بارش کی پیش گوئی کی گئی ہے۔
گلگت بلتستان اور آزاد کشمیر کے پہاڑی علاقوں میں برفباری اور بارش کا امکان ہے جس سے ٹریفک کی روانی متاثر ہو سکتی ہے۔

ممکنہ نقصانات اور حفاظتی :

تیز ہواؤں اور آسمانی بجلی سے کچے مکانات، بجلی کے کھمبوں، درختوں اور فصلوں کو نقصان پہنچ سکتا ہے۔

پہاڑی علاقوں میں مسلسل بارش کے باعث لینڈ سلائیڈنگ کے خطرات بڑھ گئے ہیں۔

شہریوں کو مشورہ دیا گیا ہے کہ وہ خراب موسم میں غیر ضروری سفر سے گریز کریں اور بجلی کی تنصیبات سے دور رہیں۔

سیاحوں کو ہدایت کی گئی ہے کہ وہ شمالی علاقوں کا رخ کرنے سے پہلے سڑکوں کی صورتحال لازمی چیک کریں۔

این ڈی ایم اے نے تمام متعلقہ صوبائی اور ضلعی اداروں کو ہائی الرٹ رہنے کا حکم دیا ہے اور عوام سے اپیل کی ہے کہ وہ بروقت معلومات کے لیے ادارے کی آفیشل ایپ 'پاک این ڈی ایم اے ڈیزاسٹر الرٹ' استعمال کریں۔